Galicia
O Sindicato de Xornalistas organiza unha acción de protesta en Compostela o 1º de maio
O sábado 1 de maio, Dia do Traballador, o Sindicato de Xornalistas de Galicia (SXG) instalará unha mesa reivindicativa-informativa na Praza de Toural de Santiago. Os xornalistas informarán aos cidadáns sobre a crise no sector mediante folletos e ofertarán os diferentes produtos (Guía Sindical, camisetas, etc.) que creou o Sindicato nos seus primeiros cinco anos de andaina.
A Mesa estará activa desde as dez da mañá até as 13:30 horas na Praza do Toural, para despois trasladarse ao Cantón do Toural (esquina Rúa Nova) fronte ao quiosco.
Despedimentos, atrasos e reducións de salarios
A crise económica que sofren todos os traballadores está a afectar especialmente aos asalariados da comunicación. Nos últimos anos a práctica totalidade de medios de Galicia despediron a informadores e/ou reduciron os ingresos daqueles que non botaron.
Nas listas do INEM de outubro de 2009 había o dobre de xornalistas inscritos que en 2008. Houbo Expedientes de Regulación de Emprego en varios medios (La Región de Ourense, negociase un en COPE, etc.) e despedimentos, entre outros, en El Correo Gallego, Diario de Pontevedra, Europa Press, Xornal de Galicia, Faro de Vigo, A nosa Terra, Axencia Galega de Noticias, ademais dos despedimentos encobertos que supuxo forzar aos aos corresponsais de EFE a facerse falsos autónomos. Mesmo desapareceron algunhas cabeceiras, como a práctica totalidade dos diarios gratuítos da autonomía (20 minutos, Que, ADN, etc).
Son moitas tamén as compañías que deben mensualidades aos informadores. No resto de medios a situación non é mellor, a metade dos traballadores do sector traballa con contratos en precario, algo que é a norma nalgúns especialistas, por exemplo, entre os reporteiros gráficos.
Por que non cumpren o que aprobaron no Parlamento de Galicia?
Os traballadores e traballadoras sofren unas condicións de emprego indignas mentres os empresarios dos medios seguen a recibir enormes axudas e contratos publicitarios de todas as administracións (Xunta, deputacións, concellos, etc.) sen a penas control. O xornalismo é o único sector económico que pode recibir subvencións públicas sen que a cambio as empresas teñan que garantir sequera o mantemento dos postos de traballo.
O Sindicato valora positivamente a interpelación do deputado José Manuel Lage (PSdeG) sobre as axudas da Xunta aos medios de comunicación. Con todo, o SXG lémbralle a socialistas, nacionalistas e 'populares' que aprobaron no Parlamento de Galicia hai máis dun ano unha proposición para que as administracións vinculen as axudas ao mantemento do emprego estábel. Porén, ningunha administración gobernada por estas tres forzas deu paso algún para o cumprimento deste acordo unánime da Cámara Galega.
2,4 millóns de axudas da çxunta sen ningún control
Por exemplo, a Xunta xa concedeu convenios (que son subvencións á marxe do DOG, a dedo e sen control) ás empresas por máis de 2,4 millóns. Mesmo parte desas axudas foron concedidas a unha empresa, La Región, ao mesmo tempo que esta lanzaba un ERE!
A consecuencia desta escandalosa política de subvencións sen pedir unhas condicións mínimas para os traballadores é a actual onda de ERES, despedimentos, atrasos nos pagos, diminución de soldos e abuso de bolseiros que soportan os profesionais da práctica totalidade dos medios.
Oposicións, mozos e teito de cristal
Ademais, a maioría das institucións non saca prazas fixas para os seus gabinetes de comunicación. E cando o fan, os procesos non garanten a libre competencia, pois a miúdo están pensados para certas persoas próximas ao responsábel político de turno.
As mulleres, maioría na profesión e nas aulas, son as que máis sofren esta nova onda de precariedade, pois elas habitualmente teñen máis difícil acceder a postos de responsabilidade. Non foi até 2009 que unha muller accedeu ao cargo de directora dun medio de comunicación en Galicia!
Os mozos xornalistas son outros dos máis prexudicados. As empresas están a substituír contratos por prazas para bolseiros, que non cotizan a Seguridade Social, non teñen dereito ao paro e cobran cantidades ridículas. Todo isto grazas a un sistema de prácticas pernicioso que a maior parte das universidades galegas se nega a regular.
Todas estas eivas non prexudican só aos informadores. A calidade das noticias é a primeira vítima da falta de dereitos laborais dos xornalistas. Ningún cidadán pode aspirar a recibir información veraz, como é o seu dereito constitucional, se os profesionais que traballan nos medios non teñen unhas condicións de traballo dignas. Noutras palabras, a precariedade dos xornalistas é a desinformación dos cidadáns.
Que é o Sindicato de Xornalistas?
O SXG é o primeiro sindicato creado por e para os profesionais da comunicación galegos. É unha organización independente e sen ningún vínculo con formacións políticas.
Cinco anos despois do seu nacemento, o Sindicato é o máis numeroso nos comités de empresa de La Voz de Galicia, Xornal de Galicia, La Región de Ourense, Diario de Ferrol e Radio Coruña-Ser. Trátase da organización sindical con máis afiliados no sector da comunicación.
Ademais da mesa no Toural, o Consello Directivo reunirase na sede do Sindicato de Xornalistas de Galicia (Costa do Veedor 37, baixo) a partir das 17:30 horas do 1 de maio.
